THUNGIP

Lawm leh gualte hong ciamnuihna peuh taksan in siam lo pipi mahin tulai
taka ih Pope thak ahi Pope Francis tangthu a tomin ei pau tawh hong gelh
khia pong ka hihi. Thu konghawnna dan deuh in cileng hih Pope thakpa min
leh kei min kibang hi, ahih hangin ka tap pa uleh ka min uh hong phuahsakpa
kibang lo se hi. Kei Zomi, amah Argentine! Kei RC, amah RC makaipi!

*Kipan ta ni.*
*Cardinal Jorge Mario Bergoglio cia mikim theih khat pen tukha ni 14 ni

akipan Pope Francis cih tawh amin hong kilaih ta hi. Hih thupen thuthak
bek hilo in mitampi tak a kilatsak thu khat a hihi. A khankhiatna
ahi Jesuits RC phungzite bangin um ngam lo liang uh a, ama sanggamnu Maria
Elena bang pen hih thu a zak ciangin sibup dektak liang hi cileng kikhial
lo ding hi. Bang hang himawk diam? Pope Francis tangthu gen lehang "Kiniam
khiatna thu" a gengen kisuak hi cih zah ciang dongin ama kiniam khiatzia
miten gen uh hi. Kum 2005 kum Pope kitel dingin zong amah pen teltuamte
lakah kihel a, Pope hong suah lohna dingin ama sanggamnu Maria Elena in
sunlezan in thungen den hi. Tuabek hi lo, amah pen mi cidam lua hi lo a, a
lungtang zong khangno ahihlai pekin ki atkhia khin ahihi. Cidamna lampan en
lehang Pope Francis pen Pope suak ding leh RC mi 2 billion kem dingin a

iplah huai lua lo khat a hihi.*
**
*Amah pen ahau lua lo innkuan sungpan hong suak hi. Apa pen Italian minam

hi a, Italy panin Argentina gamah a taite a hi uh hi. A naupan laipek a

kipan laipil mahmah khat in kiciamteh hi. Kum 21 a phak ciangin Jesuit
phungzi suak a, kum 37 aphak ciangin Agentina gama Jesuits te lakah a
zalian pen dinmunah kikoih to hi. A hunzuiin Pasianin lamsang to in,
Vatican a tun ciangin zong ama zakimpihte lakah a kiniamkhiat zo mahmah
khat ahihi. A lawmte inn nuam mahmah sungah om mah taleh amah pen mi
nautang omna Apartment Rivadavia 415 sung bekah om hi. Pope hong suah
takciangin a omna inah Mediapersons leh Journalists honkhat Video zaihna
namkim tawh hong hawh uhciangin a nasempa bang pen a khuasikmul tho liang
hileh kilawm hi. Hihpa in a pu Bergoglio pen Pope Francis ong suak ding
cih lametna nei ngei het lo hih tuak hi. Pope Francis ngiatin hibangin na
gen hi, " Pope suak ding pen Cardinalten leilu leitaw zawng uh a, Apartment

415 sung na mangngilh kha uh hi. " ciin nui hiuhiau hi.*
*Amah Pope hong suahni zanin St. Peter biakinn tuala mipi teng khempeuh

awng ziahziah uh a, tua laitak mahin Argentina te khuapi ahi Buenos Aires
ah Metropolitan Cathedral biakinn kim dimin mi 3000 val inzong zanhak
liangin na lawm ziahziah uh hi. Argentina ah a omlai peka kipan a
kikholhpih leh a muan mahmah Bishop Eduardo Garcia in zan 10 hunin alopna
Missa na bawl in, a thugenna ah " Pasian in mi minthang Maradona hong piak
khit ciangin Messi hong pia kik a, tun Pope Francis hong pia leuleu ahihman
in Pasian hoihna ih phat hi" ciliang hi. Mipi khutbet ging pen ngaih lua

kisa puak daldal liang hi. *
**
*Pope Francis hangin Argentina gam in kilamdanna tampi nei dingin ki lamen

a, kum 18 apha pan tangvalno khat bangin a genna ah " Argentina gama RC
Pawlpi a nusia khin mi tampite hong kilehkikna dingun samkik ta hen.." ci
hi. RC pawlpimi tampi takin pawldang Pastor thugen siamte thugen um in
Pawlpi taisan uh hi. Tuabek hilo, Argrentina gam i haksatna leh vangik
tampi tak zangsak in kilamdang sak ding hi cih lametna kinei ciat hi.
Argrentina gam President Cristina Fernandez de Kirchner in neihkibang
kitenna (Same sex marriage) kumpi in a thukimpih khitpen amanzong thukimpih

dinga akutna Pope Francis in nial masa pen pah malam hi*......

Pope Francis pen Pope dangte mah bangin khauhpai mahmah dinga leitung
milian tampi takin langbawl ding uh hi. Bang hang hiam cileh Numei
ordination piakna, neih kibang kitenna, naukhakna, nauphiatna etc cihte
khauh takin hong langpan ding hi. ( Tuazah cipak ni)

--

*Create in me a clean heart O Lord,*
*and do not take away your Holy Spirit within me.*
*Lungsim siangtho hong guan inla Topa aw,*
*Cikmah hunin na Khasiangtho tawh hong ki gamla sak ngei kei in.*